चकल्लस

अगहनी पुन्नमासी क्यार म्याला देखि छकि आयउँ; पयिसवा तीनि आता तूरि का परसाद घर लायऊँ। दुयि घरी दउस के चढ़तयि रहकला, बहला अउ अद्धा; चलयि लागीं चह्वद्दी ते, कहाँ संभारु कयि पायउँ। चला टींड़ी तना मनई, न ताँता टूट दुयि दिन तक; कचरि छा सात गे तिनमा, अधमरा मयिं घरयि आयउँ। सुर्ज बइठे मुजाका का कि द्वासर दिनु भवा म्याला; गड़ी गैसै, बरयिं बिजुली, चमाका देखि चउँध्यान्यउँ। जहाँ द्याखउ तहाँ ददुआ, लाग ठेंठर गड़े सरकस; ठाढ़ तंबू कनातन मा चक्यउँ, चउँक्यउँ कि बउरान्यउँ। जो देख्यउँ याक म्वहरे मा बड़ी भीरयिं बड़े जम्मट; महूँ टोयउँ कि अलबट्टी पयिसवा सातहे पायउँ। उठयिं रुपयन की छर्रयि अउर गुलछर्रयि करयिं बाबू; टिकस के चारि आना जानि मयिं जर-मूड़ ते सूख्यउँ। चवन्नी की रहयि ज्वँधरी परी झ्वारा म पीठी पर; मुलउ टिक्कसु उधारउ काढ़ि का काका न लयि पायउँ। लिहिनि वढ़कायि दस बजतयि सबयि खिरकिन कि टटियन का; ठनक तबला कि भयि भीतर टीप फिरि याक सुनि पायउँ। जो बाढ़ी चुल्ल खीसयि काढ़ि का बाबू ति मयिं बोल्यउँ; “घुसउँ भीतर ?” चप्वाटा कनपटा पर तानि का खायउँ। यितनिहे पर न ख्वपड़ी का सनीचरू उतरिगा चच्चू; सउँपि दीन्हिसि तिलंगन का चारि चबुका हुँअँउँ खायउँ। रहयिं स्यावा समिरिती के बड़े मनई कि द्यउता उयि; किहिनि पयिंयाँ-पलउटी तब छूटि थाने ति फिरि पायउँ। चला आवति रहउँ हफ्फति तलयि तुम मिलि गयउ ककुआ; रोवासा तउ रहउँ पहिले ति तुमका देखि डिंड़कार्यउँ। तनकु स्वहितायि ल्याहउँ, तब करउँ बरनकु चकल्लस का; पुरवुले पाप कीन्हेउँ, तउन दामयि दाम भरि पायउँ।