बरवै रामायण
Back to Work अवधी (Awadhi)
बरवै १
केस-मुकुट सखि भरकत मनिमय होत।
हाथ लेत पुनि मुक्ता करत उदोत॥ 1॥
बरवै २
सम सुबरन सुखमाकर सुखद न थोर।
सीय अंग, सखि! कोमल कनक कठोर॥ 2॥
बरवै ३
सियमुख सरदकमल जिमि किमि कहि जाइ।
निसि मलीन वह, निसि दिन यह बिगसाइ॥ 3॥
बरवै ४
बड़े नयन, कटि, भ्रुकुटी, भाल बिसाल।
तुलसी मोहत, मनहिं मनोहर बाल॥ 4॥
बरवै ५
चंपक-हरवा अँग मिलि अधिक सोहाइ।
जानि परै सिय हियरे जब कँुभिलाइ॥ 5॥
बरवै ६
सिय तुव अंग-रंग मिलि अधिक उदोत।
हार बेलि पहिरावौं चंपक होत॥ 6॥
बरवै ७
साधु सुसील सुमति सुचि सरल सुभाव।
राम नीतिरत, काम कहा यह पाव?॥ 7॥
बरवै ८
कुंकुमतिलक भाल, स्रुति कुंडल लोल।
कामकच्छु मिलि, सखि! कस लसत कपोल॥ 8॥
बरवै ९
भाल तिलक सर, सोहत भौंह कमान।
मुख अनुहरिया केवल चंद समान॥ 9॥
बरवै १०
तुलसी बंक बिलोकनि, मृदु मुसुकानि।
कस प्रभु नयन कमल अस कहौं बखानि॥ 10॥
बरवै ११
काम रूप सम तुलसी राम सरूप।
को कबि समसरि करै परै भवकूप॥ 11॥
बरवै १२
चढ़त दसा यह उतरत जात निदान।
कहौं न कबहूँ करकस भौंह कमान॥ 12॥
बरवै १३
नित्य नेम-कृत अरुन उदय जब कीन।
निरखि निसाकर-नृप-मुख भए मलीन॥ 13॥
बरवै १४
कमठपीठ धनु सजनी कठिन अँदेस।
तमकि ताहि ए तोरिहि कहब महेस॥ 14॥
बरवै १५
नृप निरास भए निरखत नगर उदास।
धनुष तोरि हरि सब कर हरेउ हरास॥ 15॥
बरवै १६
का घूँघट मुख मूँदहु नवला नारि?
चाँद सरग पर सोहत यहि अनुहारि॥ 16॥
बरवै १७
गरव करहु रघुनंदन जनि मन माँह।
देखहु आपनि मूरति सिय कै छाँह॥ 17॥
बरवै १८
उठी सखी हँसि मिस करि करि मृदु बैन।
सिय रघुबर के भए उनीदे नैन॥ 18॥
बरवै १९
सींक धनुष, हित सिखन, सकुचि प्रभु लीन।
मुदित माँगी इक धनुही नृप हँसि दीन॥ 19॥
बरवै २०
सात दिवस भए साजत सकल बनाउ।
का पूछहु सुठि राउ सरल सुभाउ॥ 20॥
बरवै २१
राजभवन सुख बिलसत सिय सँग राम।
विपिन चले तजि राज, सुबिधि बड़ बाम॥ 21॥
बरवै २२
कोउ कह नरनारायन, हरिहर कोउ।
कोउ कह बिहरत वन मधु मनसिज दोउ॥ 22॥
बरवै २३
तुलसी भइ मति बिथकित करि अनुमान।
राम लखन के रूप न देखेउ आन॥ 23॥
बरवै २४
तुलसी जनि पग धरहु गंग महँ साँच।
निगानाग करि नितहिं नचाइहि नाच॥ 24॥
बरवै २५
सजल कठौता कर गहि कहत निषाद।
चढ़हु नाव पग धोइ करहु जनि बाद॥ 25॥
बरवै २६
कमल कंटकित सजनी, कोमल पाड़।
निसि मलीन, यह प्रफुलित नित दरसाइ॥ 26॥
बरवै २७
द्वै भुज कर हरि रघुबर सुंदर वेष।
एक जीव कर लछिमन दूसर शेष॥ 27॥
बरवै २८
बेद-नाम कहि, अँगुरिन खंडि अकासा।
पठयो सूपनखाहि लषन के पास॥ 28॥
बरवै २९
हेमलता सिय मूरति मृदु मुसुकाई।
हेम हरिन कहँ दीन्हेउ प्रभुहिं देखाइ॥ 29॥
बरवै ३०
जटा मुकुट कर सर धनु, संग मरीच।
चितवनि बसति कनखियनु अँखियनु बीच॥ 30॥
बरवै ३१
कनकसलाक, कला ससि, दीपसिखाउ।
तारा सिय कहँ लछिमन मोहिं बताउ॥ 31॥
बरवै ३२
सीय बरन सम केतकिय अति हिय हारि।
किहेसि भँवर कर हरवा हृदय बिदारि॥ 32॥
बरवै ३३
सीतलता ससि की रहि सब जग छाइ।
अगिनि-ताप ह्वै तन कह सँचरत आइ॥ 33॥
बरवै ३४
स्याम गौर दोउ मूरति लछिमन राम।
इनते भइ सित कीरति अति अभिराम॥ 34॥
बरवै ३५
कुजन-पाल गुन-बर्जित, अकुल, अनाथ।
कहहु कृपानिधि राउर कस गुनगाथ॥ 35॥
बरवै ३६
बिरह आगि उर ऊपर जब अधिकाइ।
ए अँखियाँ दोउ बैरिनि देहिं बुझाइ॥ 36॥
बरवै ३७
उडकु न है उजियरिया निसि नहि घाम।
जगत जरत अस लागु मोहिं बिनु राम॥ 37॥
बरवै ३८
अब जीवन कै है कपि आस न कोइ।
कनगुरिया कै मुँदरी कं कन होइ॥ 38॥
बरवै ३९
राम-सुजस कर चहुँ जुग होत प्रचार।
असुरन कहँ लखि लागत जग अँधियार॥ 39॥
बरवै ४०
सिय-वियोग-दुख केहि विधि कहौं बखानि।
फूलवान ते मनसिज बेधत आनि॥ 40॥
बरवै ४१
सरद चाँदनी सँचरत चहुँ दिसि आनि।
बिधुहि जोरि कर बिनवति कुलगुरु जानि॥ 41॥
बरवै ४२
बिबिध बाहिनी विलसति सहित अनंता।
जलधि सरिस को कहै राम भगवंता॥ 42॥
बरवै ४३
चित्रकूट पयतीर सो सुर-तरु-बासा।
लखन-राम सिय सुमिरहु तुलसीदासा॥ 43॥
बरवै ४४
पय नहाइ फल खाहु, परिहिय आस।
सीयराम-पद सुमिरहु तुलसीदासा॥ 44॥
बरवै ४५
स्वारथ परमारथ हित एक उपाय।
सीयराम-पद तुलसी प्रेम बढ़ाय॥ 45॥
बरवै ४६
काल कराल बिलोकहु होइ सचेत।
रामनाम जपु तुलसी प्रीति समेत॥ 46॥
बरवै ४७
संकट सोचविमोचन, मंगलगेह।
तुलसी रामनाम पर करिय सनेह॥ 47॥
बरवै ४८
रामनाम जपु तुलसी नित निरपाधि॥ 48॥
बरवै ४९
रामनाम दुइ आखर हिय हितु जानु।
राम लखन सम तुलसी सिखब न आनु॥ 49॥
बरवै ५०
माय पाप गुरु स्वामि राम कर नाम।
तुलसी जेहि न सोहाइ ताहि विधि बाम॥ 50॥
बरवै ५१
रामनाम जपु तुलसी होइ बिसोक।
लोक सकल कल्यान, नीक परलोक॥ 51॥
बरवै ५२
तप, तीरथ, मख, दान, नेम, उपवासा।
सब ते अधिक राम जपु तुलसीदासा॥ 52॥
बरवै ५३
महिमा रामनाम कै जान महेस।
देत परम पद कासी करि उपदेस॥ 53॥
बरवै ५४
जान आदि-कवि तुलसी नामप्रभाउ।
उलटा जपत कोल ते भए ऋषिराउ॥ 54॥
बरवै ५५
कलसजोनि जिय जानेउ नामप्रतापु।
कौतुक सागर सोखेउ करि जिय जापु॥ 55॥
बरवै ५६
तुलसी सुमिरत राम सुलभ फल चारि।
बेद पुरान पुकारत, कहत पुरारि॥ 56॥
बरवै ५७
रामनाम पर तुलसी नेह निवाहु।
एहि ते अधिक, न एहि सम जीवनलाहु॥ 57॥
बरवै ५८
दोष-दुरित-दुख-दारिद-दाहक नाम।
सकल सुमंगलदायक तुलसी राम॥ 58॥
बरवै ५९
केहि गिनती महँ? गिनती जब बनघास।
राम जपत भए तुलसी तुलसीदास॥ 59॥
बरवै ६०
आगम निगम पुरान कहत करि लीक।
तुलसी नाम राम कर सुमिरन नीक॥ 60॥
बरवै ६१
सुमिरहु नाम राम कर, सेवहु साधु।
तुलसी उतरि जाहु भव उदधि अगाधु॥ 61॥
बरवै ६२
कामवेनु हरिनाम, कामतरु राम।
तुलसी सुलभ चारि फल सुमिरत नाम॥ 62॥
बरवै ६३
तुलसी कहत सुनत सब समुझत कोय।
बड़े भाग अनुराग राम सन होय॥ 63॥
बरवै ६४
एकहि एक सिखावत जपते आप।
तुलसी रामप्रेम कर बाधक पाप॥ 64॥
बरवै ६५
मरम कहत सब सब कहँ सुमिरहु राम।
तुलसी अब नहिं जपन समुझि परिनाम॥ 65॥
बरवै ६६
तुलसी रामनाम जपु आलस छाँडु।
रामबिमुख कलिकाल क भयो न भाँडु॥ 66॥
बरवै ६७
तुलसी रामनाम सम मित्र न आना।
जो पहुँचाव रामपुर तनु अवसान॥ 67॥
बरवै ६८
नाम भरोस, नाम बल, नाम सनेहु।
जनम जनम रघुनंदन तुलसिहि देहु॥ 68॥
बरवै ६९
जनम जनम जहाँ जहाँ तनु तुलसिहि देहु।
तहँ तहँ राम निबाहिह नामसनेहु॥ 69॥
Contributors
𑂄𑂠𑂩𑂹𑂬 𑂫𑂩𑂹𑂧𑂰
सामुदायिक संरक्षण / Community Custodianship
इस अध्याय की अनुवाद स्थिति
Chapter Translation Coverage & Stewardship
यह अध्याय पूर्णतः अनूदित है! आप पाठ की प्रामाणिकता हेतु संशोधन या समीक्षा प्रस्तुत कर सकते हैं।
अनुवाद पूर्णता / Completion: 100% 69/69 छंद अनूदित