उल्लू हाओ

तुम चाहत हौ भाईचारा उल्लू हौ देखै लागेव दिनय मा तारा उल्लू हौ। समय कय समझौ यार इसारा उल्लू हौ तुमहूँ मारव हाथ करारा उल्लू हौ। कइसे इंटर पास किहेव बस जानि गयन कहा इक्यासी लिखेव अठारा उल्लू हौ। कट्टरपंथी जाल से हमतौ भागि लिहेन तुमहूँ होइ जाव नौ दुइ ग्यारा उल्लू हौ। जवान बीबी छोड़ि के दुबई भागत हौ जैसे तैसे करौ गुजारा उल्लू हौ। भीड़ मा घुसिके झगड़ा देखा चाहत हौ दूरै से बस करौ नजारा उल्लू हौ। कहत रहेन ना फँसौ प्यार के चक्कर मा झुराइके होइ गयौ छोहारा उल्लू हौ। दहेज मा मारूती पायौ खुसी भई दुलहिन पायउ महयँ खटारा उल्लू हौ। डिगरी लइके बेटा दर-दर भटकौ ना हवा भरौ बेचौ गुब्बारा उल्लू हौ। इनका, उनका, रफीक का गोहरावत हौ जब वै चहिहैं मिले किनारा उल्लू हौ।