Pad (पद) अवधी • Awadhi
कृपा सो धौं कहाँ बिसारी राम ।जेहि करुना सुनि श्रवन दीन-दुख धावत हौ तजि धाम ॥नागराज निज बल बिचारि हिय हारि चरन चित दीन ।आरत गिरा सुनत खगपति तजि चलत बिलंब न कीन ॥दितिसुत-त्रास त्रसित निसि दिन प्रहलाद प्रतिज्ञा राखी ।अतुलित बल मृगराज-मनुज-तनु दनुज हत्यो श्रुति साखी ॥भूप सदसि सब नृप बिलोकि प्रभु राखु कह्यो नर-नारी ।बसन पूरि, अरि-दरप दूरि करि भूरि कृपा दनुजारी ॥एक एक रिपु ते त्रासित जन तुम राखे रघुबीर ।अब मोहि देत दुसह दुख बहु रिपु कस न हरहु भव-पीर ॥लोभ ग्राह, दनुजेस-क्रोध, कु रुराज-बंधु खल मार ।तुलसिदास प्रभु यह दारुन दुख भंजहु राम उदार