Pad (पद) अवधी • Awadhi
मेरी न बनै बनाये मेरे कोटि कलप लौं,राम ! रावरे बनाए बनै पल-पाउ मैं ।निपट सयाने हौ कृपानिधान ! कहा कहौं ?लिये बेर बदलि अमोल-मनि-आउ मैं ॥मानस मलीन, करतब कलिमल-पीन,जीह हू न जप्यो नाम, बक्यो आउ बाउ मैं ।कु पथ कु चाल चल्यो, भयो न भूलि हूँ भलो,बाल-दसा हूँ न खेल्यो खेलत सुदाउँ मैं ॥देखा-देखी दंभ तें, कि संग तें भई भलाई,प्रकटि जनाई, कियो दुरित-दुराउ मैं ।राग रोष द्वेष पोषे, गोगन समेत मन,इनकी भगति कीन्ही इनही को भाउ मैं ॥आगिली पाछिली, अबहूँ की अनुमान ही तें,बूझियत गति, कछु कीन्हों तो न काउ मैं ।जग कहै राम की प्रतीति प्रीति तुलसी हूँ,झूठे-साँचे आसरो साहब रघुराउ मैं