रामाज्ञाप्रश्न
प्रथम सर्ग
Back to Work अवधी (Awadhi)
दोहा १
बानि बिनायकु अंब रबि गुरु हर रमा रमेस।
सुमिरि करहु सब काज सुभ, मंगल देस बिदेस।।
दोहा २
गुरु सरसइ सिंधुर बदन ससि सुरसरि सुरगाइ।
सुमिरि चलहु मग मुदित मन, होइहि सुकृत सहाइ।।
दोहा ३
गिरा गौरि गुरु गनप हर मंगल मंगल मूल।
सुमिरत करतल सिद्धि सब, होइ ईस अनुकूल।।
दोहा ४
भरत भारती रिपु दवनु गुरू गनेस बुधवार।
सुमिरत सुलभ सुधर्म फल, बिद्या ब्य बिचार।।
दोहा ५
सुरगुरु गुरु सिय राम गन राउ गिरा उर आनि।
जो कछु करिय सो होय सुभ, खुलहिं सुमंगल रानि।।
दोहा ६
सुक्र सुमिरि गुरु सारदा गनपु लखनु हनुमान।
करिय काजु सब साजु भल, निपटहिँ नीक निदान।।
दोहा ७
तुलसी तुलसी राम सिय, सुमिरि लखनु हनुमान।
काजु बिचारेहु सो करहु, दिनु दिनु बड़ कल्यान।।
दोहा १
दसरथ राज न ईति भय, नहिं दुख दुरित दुकाल।
प्रमुदित प्रजा प्रसन्न सब, सब सुख सदा सुकाल।।
दोहा २
कौसल्या पद नाइ सिर, सुमिरि सुमित्रा पाय।
करहु काज मंगल कुसल, बिधि हरि संभु सहाय।।
दोहा ३
न्रिधिनबस बन मृगया फिरत दीन्ह अन्ध मुनि साप।
सो सुनि ब्रिपति बरिषाद बड़, प्रजहि सोक संताप।।
दोहा ४
सुतहित निनती कोन्ह नृप, कुलगुरु कहा उपाउ।
होइहि भल संतान सुनि प्रमुदित कोसल राउ।।
दोहा ५
पुत्र जागु करवाइ रिषि राजहि दीन्ह प्रसाद।
सकल सुमंगल मूल जग भूसुर आसिरबाद।।
दोहा ६
राम जनम घर घर अवध मंगल गान निसान।
सगुन सुहावन होइ सत मंगल मोद निधान।।
दोहा ७
राम भरतु सानुज लखन दसरथ बालक चारि।
तुलसी सुमिरत सगुन सुभ मंगल कहब पचारि।।
दोहा १
भूप भवन भाइन्ह सहित रघुबर बाल बिनोद।
सुमिरत सब कल्यान जग, पग पग मंगल मोद।।
दोहा २
करन बेध चूड़ा करन, श्रीरघुबर उपबीत।
समय सकल कल्यानमय, मंजुल मंगल गीत।।
दोहा ३
भरत सत्रुसूदन लखन सहित सुमिरि रघुनाथ।
करहु काज सुभ साज सब, मिलहि सुमंगल साथ।।
दोहा ४
राम लखनु कौसिक सहित सुमिरहु करहु पयान।
लच्छि लाभ जय जगत जसु, मंगल सगुन प्रमान।।
दोहा ५
मुनिमखपाल कृपाल प्रभु चरनकमल उर आनु।
तजहु सोच, संकट मिटिहि, सत्य सगुन जियें जानु।।
दोहा ६
हानि मीचु दारिद दुरित आदि अंत गत बीच।
राम न्रिमुख अघ आपने गये निसाचर नीच।।
दोहा ७
सिला साप मोचन चरन सुमिरहु तुलसीदास।
तजहु सोच, संकट मिटहि, पूजिहि मन कै आस।।
दोहा १
सीय स्वयंबर समउ भल, सगुन साध सब काज।
कीरति बिजय बिबाह बिधि, सकल सुमंगल साज।।
दोहा २
राजत राज समाज महेँ राम भंजि भव चाप।
सगुन सुहावन, लाभ बड़, जय पर सभा प्रताप।।
दोहा ३
लाभ मोद मंगल अवधि सिय रघुबीर बिबाहु।
सकल सिद्द्धि दायक समउ सुभ सब काज उछाहु।।
दोहा ४
कोसल पालक बाल उर सिय मेली जयमाल।
समउ सुहावन सगुन भल, मुद मंगल सब काज।।
दोहा ५
हरषि विबुध बरषहिं सुमन, मंगल गान निसान।
जय जय रघुकुल कमल रबि मंगल मोद निधान।।
दोहा ६
सतानंद पठये जनक दसरथ सहित समाज।
आये तिरहुत सगुन सुभ, भये सिद्ध सब काज।।
दोहा ७
दसरथ पूरन परम ब्रिधु, उदित समय संजोग।
जनक नगर सर कुमुदगन, तुलसी प्रमुदित लोग।।
दोहा १
मन मलीन मानी महिप कोक कोकनद बृंद।
सुहृद समाज चकोर चित प्रमुदित परमानंद।।
दोहा २
तेहि अवसर रावन नगर असगुन असुभ अपार।
होहि हानि भय मरन दुख सूचक बारहिं बार।।
दोहा ३
मधु माधव दसरथ जनक, मिलब राज रितुराज।
सगुन सुवन नव दल सुतरु, फूलत फलत सुकाज।।
दोहा ४
बिनय पराग सुप्रेम रस, सुमन सुभग संबाद।
कुसुमित काज रसाल तरु सगुन सुकोकिल नाद।।
दोहा ५
उदित भानु कुल भानु लखि लुके उलूक नरेस।
गये गँवाइ गरूर पति, :धनु मिस हये महेस।।
दोहा ६
चारि चारु दसरथ कुँवर निरखि मुदित पुर लोग।
कोसलेस मिथिलेस को समउ सराहन जोग।।
दोहा ७
एक वितान बिबाहि सब सुवन सुमंगल रूप।
तुलसी सहित समाज सुख सुकृत सिंधु दोउ भूप।।
दोहा १
दाइज भयउ अनेक बिधि, सुनि सिहाहिं दिसिपाल।
सुख संपति संतोषमय, सगुन सुमंगल माल।।
दोहा २
बर दुलहिनि सब परसपर मुदित पाइ मनकाम।
चारु चारि जोरी निरखि दुहुँ समाज अभिराम।।
दोहा ३
चारिउ कुँवर बरियाहि पुर गवने दसरथ राउ।
भये मंजु मंगल सगुन गुर सुर संभु पसाउ।।
दोहा ४
पंथ परसु धर आगमन समय सोच सब काहु।
राज समाज विषाद बड़, भय बस मिटा उछाहु।।
दोहा ५
रोष कलुष लोचन भ्रुकुटि, पानि परसु धनु बान।
काल कराल बिलोकि मुनि सब समाज बिलखान।।
दोहा ६
प्रभुहि सौँपि सारंग मुनि दीन्ह सुआसिरबाद।
जय मंगल सूचक सगुन राम राम संबाद।।
दोहा ७
अवध अनंद बधावनो, मंगल गान निसान।
तुलसी तोरन कलस पुर चँवर पताक बनितान।।
दोहा १
साजि सुमंगल आरती, रहस बिबस रनिवासु।
मुदित मात परिछन चलीं उमगत हृदये हुलासु।।
दोहा २
करहि निछावरि आरती, उमगि उमगि अनुराग।
बर दुलहिन अनुरूप लखि सखी सराहहिँ भाग।।
दोहा ३
मुदित नगर नर नारि सब, सगुन सुमंगल मूल।
जय धुनि मुनि सुर दुंदुभी बाजहिं बरषहिं फूल।।
दोहा ४
आये कोसलपाल पुर, कुसल समाज समेत।
समउ सुनत सुमिरत सुखद, सकल सिद्दि सुभ देत।।
दोहा ५
सूप सील बय बंस गुन, सम विबाह भये चारि।
मुदित राउ रानी सकल, सानुकूल त्रिपुरारि।।
दोहा ६
बिधि हरि हर अनुकूल अति दशरथ राजहि आजु।
देखि सराहत सिद्ध सुर संपति समय समाजु।।
दोहा ७
सगुन प्रथम उनचास सुभ, तुलसी अति अभिराम।
सब प्रसन्न सुर भूमिसुर, गो गन गंगा राम।।
Contributors
𑂄𑂠𑂩𑂹𑂬 𑂫𑂩𑂹𑂧𑂰
सामुदायिक संरक्षण / Community Custodianship
इस अध्याय की अनुवाद स्थिति
Chapter Translation Coverage & Stewardship
यह अध्याय पूर्णतः अनूदित है! आप पाठ की प्रामाणिकता हेतु संशोधन या समीक्षा प्रस्तुत कर सकते हैं।
अनुवाद पूर्णता / Completion: 100% 49/49 छंद अनूदित