कृष्ण-महिमा गान

कामधेनु सुरतरू सहित, दीन्हीं सब बलवीर। जानि पीर गुरु बन्धु जन, हरि हरि लीन्हीं पीर॥८७॥

विविध भाँति सेवा करी, सुधा पियायो बाम। अति विनीत मृदु वचन कहि, सब पुरो मन काम॥८८॥

लै आयसु, प्रिय स्नान करि, सुचि सुगन्ध सब लाइ। पूजी गौरि सोहाग हित, प्रीति सहित सुख पाइ॥८९॥

षट्रस विविध प्रकार के, भोजन रचे बनाय। कंचन थार मंगाइ कै, रचि रचि धरे बनाय॥९०॥

कंचन चौकी डारि कै, दासी परम सुजानि। रतन जटित भाजन कनक, भरि गंगोदक आनि॥९१॥

घट कंचन को रतनयुत, सुचि सुगन्धि जल पूरि। रच्छाधान समेत कै, जल प्रकास भरपूरि॥९२॥

रतन जटित पीढ़ा कनक, आन्यो जेंवन काम। मरकत-मनि चौकी धरी, कछुक दूरि छबि धाम॥९३॥

चौकी लई मँगाय कै, पग धोवन के काज। मनि-पादुका पवित्र अति, धरी विविध विधि साज॥९४॥

चलि भोजन अब कीजिये, कह्यो दास मृदु भाखि। कृस्न कृस्न सानन्द कहि, धन्य भरी हरि साखि॥९५॥

बसन उतारे जाइ कै, धोवत चरन-सरोज। चौकी पै छबि देत यौं, जनु तनु धरे मनोज॥९६॥

पहिरि पादुका बिप्र बर, पीढ़ा बैठे जाय। रति ते अति छवि-आगरी, पति सों हँसि मुसकाय॥९७॥

बिबिध भाँति भोजन धरे, व्यंजन चारि प्रकार। जोरी पछिओरी सकल, प्रथम कहे नहिं पार॥९८॥

हरिहिं समर्पो कन्त अब, कहो मन्द हँसि बाम। करि घंटा को नाद त्यों, हरि समर्पि लै नाम॥९९॥

अगिनि जेंवाय विधान सों, वैस्यदेव करि नेम। बली काढ़ि जेंवन लगे, करत पवन तिय प्रेम॥१००॥

बार बार पूछति प्रिया, लीजै जो रुचि होइ। कृस्न-कृपा पूरन सबै, अबै परोसौं सोइ॥१०१॥

जेंइ चुके, अँचवन लगे, करन हेतु विश्राम। रतन जटित पलका-कनक, बुनो सो रेशम दाम॥१०२॥

ललित बिछौना बिरचि कै, पाँयत कसि कै डोरि। राखे बसन सुसेवकनि, रुचिर अतर सों बोरि॥१०३॥

पानदान नेरे धर्यो भरि, बीरा छवि-धाम। चरन धोय पौढ़न लगे, करन हेतु विश्राम॥१०४॥

कोउ चँवर कोउ बीजना, कोउ सेवत पद चारू। अति विचित्र भूषन सजे, गज मोतिन के हारू॥१०५॥

करि सिंगार पिय पै गई, पान खाति मुसुकाति। कहौ कथा सब आदि तें, किमि दीन्हों सौगाति॥१०६॥

कही कथा सब आदि ते, राह चले की पीर। सोवत जिमि ठाढ़ो कियो, नदी गोमती तीर॥१०७॥

गये द्वार जिहि भाँति सों, सो सब करी बखानि। कहि न जाय मुख लाल सों, कृस्न मिले जिमि आनि॥१०८॥

कर गहि भीतर लै गए, जहाँ सकल रनिवास। पग धोवन को आपुही, बैठे रमानिवास॥१०९॥

देखि चरन मेरे चल्यो, प्रभु नयनन तें बारि। ताही सों धोये चरन, देखि चकित नर-नारि॥११०॥

बहुरि कही श्री कृस्न जिमि, तन्दुल लीन्हें आप। भेंटे हृदय लगाय कै, मेटे भ्रम सन्ताप॥१११॥

बहुरि कही जेवनार सब, जिमि कीन्हीं बहु भाँति। बरनि कहाँ लगि को कहै, सब व्यंजन की पाँति॥११२॥

जा दिन अधिक सनेह सों, सपन दिखायो मोहिं। से देख्यो परतच्छ ही, सपन न निष्फल होहिं॥११३॥

बरनि कथा वहि विधि सबै, कह्यौ आपनो मोह। वृथा कृपानिधि भगत-हितु, चिदानन्द सन्दोह॥११४॥

साजे सब साज, बाजि गज राजत हैं, विविध रुचिर रथ पालकी बहल है। रतनजटित सुभ सिंहासन बैठिबे को, चौक कामधेनु कल्पतरूहू लहलहैं। देखि देखि भूषण वसन-दासि दासन के, सुख पाकसासन के लागत सहल है। सम्पति सुदामा जू को कहाँ लौं दई है प्रभु, कहाँ लौं गिनाऊँ जहाँ कंचन महल है॥११५॥

अगनित गज बाजि रथ पालकी समाज, ब्रजराज महाराज राजन-समाज के। बानिक विविध बने मंदिर कनक सोहैं, मानिक जरे से मन मोहें देवतान के। हीरा लाल ललित झरोखन में झलकत, किमि किमि झूमर झुलत मुकतान के। जानी नहिं विपति सुदामा जू की कहाँ गई, देखिये विधान जदुराय के सुदान के॥११६॥

कहूँ सपनेहूँ सुबरन के महल होते, पौरि मनि मण्डित कलस कब धरते। रतन जटित सिंहासन पर बैठिबे को, कब ये खबास खरे मौपे चौंर ढरते। देखि राजसामा निज बामा सों सुदामा कह्यो, कब ये भण्डार मेरे रतनन भरते। जो पै पतिवरता न देती उपदेश तू तो, एती कृपा द्वारिकेस मो पैं कब करते॥११७॥

पहरि उठे अम्बर रुचिर, सिंहासन पर आय। बैठे प्रभुता निरखि कै, सुर-पति रह्यो लजाइ॥११८॥

कै वह टूटि सी छानि हती, कहाँ कंचन के सब धाम सुहावत। कै पग में पनही न हती, कहँ लै गजराजहु ठाढ़े महावत। भूमि कठोर पै रात कटै, कहाँ कोमल सेज पै नींद न आवत। कैं जुरतो नहिं कोदो सवाँ, प्रभु के परताप तै दाख न भावत॥११९॥

धन्य धन्य जदुवंश-मनि, दीनन पै अनुकूल। धन्य सुदामा सहित तिय, कहि बरसहिं सुर फूल॥१२०॥